سيد ممدوح :الجمهور سيتفاجىء بشخصية فرج الصاوي فى وجع البنات

 

الفنان الشاب المتألق سيد ممدوح قدم العديد من الأدوار المختلفة والمتنوعة وحقق نجاح كبير فى العديد من الأعمال التى قدمها سواء مسلسلات أم مسرحيات وحصل على العديد من الجوائز ومن أهم أدواره منتهى العشق وسلسال الدم وقريبا ستعرض له أدوار بيعتبرها مفاجئة للجمهور 

كلمنا عن بداية إنطلاق الموهبة ؟

بدايتى مع التمثيل لما كنت طالب فى كلية ألسن جامعة عين شمس ، كنا بندرس  روايات شكسبير ونمثلها على مسرح الكلية باللغة الإنجليزية  زى هاملت وماكبت وغيرها من المسرحيات ، بدأ حبي للتمثيل يظهر وناس كتير شجعتنى إنى أستمر لانى موهوب من وجهة نظرهم ومن هنا قررت أن أقدم فى معهد فنون مسرحية قسم تمثيل وإخراج وهذه كانت البداية الحقيقية وأنا فى سنة أولى ، كانت الفنانة تيسير فهمى بتعمل مسلسل قلب الدنيا ورشحوني للدور وعملت دور شخص امريكى مصري ساعدها فى رحلة هروبها 

ونال دورى اعجاب الجمهور والمخرج كان محمد ابو سيف 

كلمنا عن أدوارك فى المسلسلات 

بعد كدة أنطلقت وشاركت فى العديد من المسلسلات زى أبو ضحكة جنان قصة حياة الفنان إسماعيل يس، والضاحك الباكي قصة حياة نجيب الريحاني ، ومن أهم أدوارى فى مسلسل سلسال الدم ومسلسل الامام الشافعي، عملت دور محمد بن عبد الحكم ، ومن اروع الادوار اللى عملتها مسلسل منتهى العشق حقق لى نجاح رهيب وانطلاقة مميزة جدا 

كنت عامل دور كريم الشاب الاسكندراني ، كان شاب مقيم فى شرم الشيخ وبيعمل كل الموبيقات عشان يوصل لاهدافه

العقبات التى واجهتها أثناء مشوارك الفني 

فى 2010 حصلت على جائزة أحسن شاب ممثل فى مصر ولكن 

جت ثورة 2011 عطلتنى كثيرا بسبب ركود المجال الفنى فى هذه الفترة واستمر الركود ما يقرب من اربعة سنوات وحاولت كثيرا إنى اعود من تاني فى مجال الفن  وانشغلت بشغلي فى مجال اللغات والترجمة الخاص بالمؤسسات والبنوك 

وبعدها عملت مسلسل سلسال الدم كان دور من أهم أعمالي الفنية عملت دور فراج بن العمدة رياض الخولي 

وفراج كان أول من فتح سلسال الدم 

الدور ده أخدت عليه العديد من الجوائز وخصوصا انه كان باللهجة الصعيدية .

هل لك أعمال فنية تحب تتذكرها معنا 

كان فى مسلسلات كثير فى النصف مثل الصفعة مع الفنان الكبير شريف منير من إخراج الاستاذ مجدي أبو عميرة كان دورى رئيس،الدفاع الاسرائيلي

وعملت دور فى فيلم مع الفنانة تيسير فهمي وشاركت فى العديد من المسرحيات زى حارة المتولي ودولة بهانة وكنا هنعرض دولة بهانة فى المغرب بس ظروف عطلتنا 

أعمالك الفنية الجديدة 

عملت مع المخرج احمد النحاس الله يرحمه دور حلو فى مسلسل وجع البنات وهذا الدور انا براهن عليه 

دور فرج الصاوي محامى شرير جدا ، الجمهور هيتفاجىء بيه

فى مسلسل قريبا هيتعرض أسمه أيام القصر بعمل فيه دور علاء مبارك وده هيتعرض قريبا لكن مش عارف امتى لان كل شوية بغيروا النهايات ،

ده من الاعمال الجامدة اللى براهن عليها وفى عمل جديد بنجهزله لرمضان القادم باذن الله

اذكر لنا موقف اتعرضت له أثناء التصوير

أكثر موقف أثر فيا جدا أتعرضت له أثناء التصوير ، كنا بنصور مسلسل سلسال الدم مشهد موت فراج وهو بيضرب بالنار كان رايح يقضي شهر العسل بالإسكندرية هو وعروسته فبينضرب بالنار على الكورنيش،

الناس كانت كتيرة جدا بتتفرج علينا فى كورنيش أبو قير كان أمم من الناس وبعد ما خلصنا التصوير لاقيت سيدة بتجرى عليا عشان تطمن وهى منهارة من العياط وقولتلها والله العظيم انا بخير وممتش ده تمثيل مش حقيقة فقالتلى لا يابنى دول ضربوك بالنار ، المهم كانت متأثرة جدا وفضلنا ساعتين نهدي فيها كنا خايفين يحصل لها حاجة ، ده من المواقف اللى عمرى ما هنساها 

دور الجمهور فى حياة الفنان 

الجمهور هو أهم عنصر من عناصر النجاح ، احنا بنقدم الفن اللى بيرتقى بالجمهور وبيقدم لهم اهداف وبنحاول نسعد الجمهور بالأعمال الفنية والجمهور هو نجاح الفنان وتاريخه وبوجه للجمهور كامل التحية والتقدير وسعيد جدا ان الجمهور فاكر كل اعمالي ومبسوط بأدوارى 

وعشان بحب الجمهور انا بختار الأدوار اللى ليها معنى وهدف ، الادوار التى ترتقي بالجمهور حتى انال احترام وتقدير جمهوري.

ودعونا نعترف ان هناك ظلم للمواهب فى مجال الفن ولكن الجمهور هو المنصف للمواهب الشابة .

هل لك جمهور مغربي وأصدقاء 

انا ليا اصدقاء من المغرب كتير جدا بيتواصلوا معايا وبقايلهم لما بيزوروا مصر لكن لم يحالفنى الحظ بزيارة المغرب وعندى امل ان يتم عرض مسرحية دولة بهانة بالمغرب بعد انهاء الاجراءات 

كل شكري وتقديري لشعب المغرب الشقيق ولقيادات وحكومة المملكة  ويارب ديما تدوم المحبة بين البلدين .

اقرب الاصدقاء ليك من اهل الفن 

أصدقائي المقربين من أهل الفن كتير وخصوصا اللى أشتغلت معاهم وأقربهم لي الفنان الجميل محمد رياض ، حقيقى هو أسطورة على مستوى الوطن العربي وإنسان جميل ديما بنتواصل وأيضا المخرج الكبير مجدى ابو عميرة  من أصدقائي،المقربين وفنانيين كتير مش عاوز أنسي حد منهم فكلهم أصدقاء محترمين وراقيين .