سر الجزيرة الغامضة التى ظهرت فجأة فى خرائط جوجل

 

لو أنتَ لسه متعرفش، فحابه أقولك إن الانترنت مقلوب بقاله كام يوم على الصورة الي تحت دي..

والي هي عُبارة عن جزيرة في وسط المُحيط ظهرت فجأة على Google maps من العدم ..

الصورة اتحطت على موقع Reddit وحاول البعض أنه يلاقي اجابة للشكل الغريب للجزيرة..

شكلها الهرمي والعُمق الأسود بداخلها، والإطار الي محدد الهرم ده بلونه المُشع الغريب، إضافةً للهالة الغريبة حواليها..

الإجابات الي تم طرحها في مُحاولة لتفسير الظهور الغامض للجزيرة المُثيرة دي لحد دلوقتي مفيش فيهم حاجة منطقية..

يعني واحد اقترح إن مُمكن يكون سبب الشكل الغريب للجزيرة ده هو إن مُمكن يكون الجُزء الداخلي للجزيرة "مُشوّش" بسبب استخدامها من قبل المُخابرات..

والي احنا مش قادرين نحدد مكانها لأن احداثياتها لحد دلوقتي تكاد تكون مُضللة ومش مفهومة وده الي زوّد الغموض حواليها..

واحد تاني كاتب انها مُمكن تكون بوابة لعالم تاني او أرض مُوازية..

واحد تاني كتب تعليق ساخر وقال "سيداتي آنساتي لقد وجدوا أخيرًا الجزيرة الضائعة في مُسلسل Lost" وده مُسلسل شهير كان بيتكلم عن مجموعة تاهت في جزيرة عليها حقل طاقة كهرومغناطيسي ضخم مُستحوّذ من قبل كائن ماورائي..

أما بالنسبة لنا في الوطن العربي، ففي ثقافتنا هتلاقي إن كان في حديث نبوي شريف، بيحكي عن شخص اسمه "تميم الداري" والي تاه في البحر وظهرت له في مكان بالمُحيط من العدم جزيرة غريبة جدًا..

ولما نزل عليها مع رجاله قابل "المسيح الدجال" وكائن تاني اسمه الجساسة، وسأله كام سؤال وبعدين قاله انه هيظهر للبشر في آخر الزمان..

كمان عندك في بردية قديمة اسمها "الملاح المصري الغريق" بتحكي حكاية مُشابهة عن بحار مصري سافر مع أسطول مصري في المُحيط ولما غرق الأسطول كاملاً بمن عليه واتبقى هو لوحده لقى جزيرة في عرض المُحيط في مكان محدش يعرفه لحد النهاردة وسماها جزيرة الثعبان..

والملاح المصري قضى عليها فترة وشاف فيها كيان غريب مُرعب واتكلم معاه برضه وحذره من انه يحكي عنه وأغدق عليه بالخيرات..

المُهم دلوقتي إن العالم لحد دلوقتي مش عارف يحدد الجزيرة دي كانت فين قبل كده وليه ظهرت دلوقتي وإزايّ كانت مش واضحة قبل كده على القمر الصناعي..

تفتكر ايه التفسير المنطقي لظهور جزيرة بالشكل ده في الوقت ده..؟