تعملى ايه لو حد بيبتزك بصورك او وضع لكى فيديو على اليوتيوب او ذكرك على النت

 

ناس كتير احتمال ده يكون اهم بوست فى حياتها فركزوا كويس .. 

لو حد سرق صورك او فيديوهاتك وبيبتزك بيهم ..

فى البوست ده هتعرفى ازاى تبهدليه وتخليه يندم انه عمل كده ..  

لو حد سرق صورك وبدأ يكلمك فى الشات ويقولك معايا صور ليكي " وانتى حرانة شوية " 

ابعتيلي فلوس او ابعتيلي حاجة تانية .. والصور دى وصلها بطريقة ما منك سواء عمل هاك واخترقك وسرقها او بعتيها لصاحبتك وخدها او اخدها بطريقة ما منك او حد سرق تليفونك او بتصلحيه عند واحد معندوش ضمير واخدها  ..

فى الحالة دى هتعملى ايه ؟

اولا : انسي تماما انك توافقى على اى حاجة .. المرة الاولى اللى هتوافقي على اى حاجة مش هتعرفى ترفضي اى حاجة تانية لانه عرف انك خايفه خلاص وبدأ يتحكم فيكى.. 

طيب ايه التصرف الصح اللى ممكن تعمليه فى حالة الابتزاز الالكترونى ؟

لو المبتز او الشخص ده كلمك على المسنجر  وبعتلك صورك او حطها على صفحته وعامل البوست خاص محدش يشوفه غيرك كنوع من التخويف ليكي انه ممكن ينشره عادى ..

الفيس بوك عامل قسم مخصوص لموضوع الابتزاز الالكترونى والرابط بتاعه هحطه فى الكومنتات ..

ولو انتو بتخافوا من الروابط ( وده صح جدا ) .. ممكن تفتحوا جوجل وتكتبوا الجملة دى فى السيرش 

" انا عاوزة ابلغ عن واحد وسخ بيبتزنى على الفيس بوك وعاوزة افسحه " 

بالسين مش بالشين متفهمونيش غلط 😂

وهتختارى اول رابط طلعلك فى البحث بتاع جوجل  ... بتطلعلك صفحة تكتبى فيها البيانات اللى هيطلبها الفيس وتنسخى الشات اللى ما بينكم وتحطيه ضمن البيانات دى وتحطى رابط صفحته او رابط الفيديو اللى منزلهولك على الصفحة .. وبتدوسي ارسال 

بعد كام يوم الفيس بوك بيتأكد ان الشخص ده فعلا بيبتزك .. بيروح قافل على الشخص ده الاي بي بتاع جهازه ومبيدخلهوش فيس تانى ..

المرحلة التانية : ازاى تعرفى ان حد ذكر اسمك اساسا على جوجل او حط حاجة باسمك .. دى خاصية حلوة خالص انا مسميها " جوجل الخباص " .. بتعمليها ازاى ؟

بتدخلى على بحث جوجل وبتكتبي 

google alert 

هتفتحى اول رابط يطلعلك فى البحث وتحطى الجي ميل بتاعك وبتكتبي اسمك واختارى فى اول اختيار جملة " عند حدوثها "

وبكده اى حد هيكتب اسمك فى اى حاجة فى بوست او فيديو هيجيلك اشعار بيها ويوريهالك وبكده تلحقى اى حاجة فى اولها

المرحلة التالتة : لو حد رفعلك فيديو على اليوتيوب .. بتدخلى على الفيديو وتعملى ريبورت عليه وتختارى " انتهاك خصوصيتى وبعد ما بتكتبي البيانات اللى عاوزها الفيديو بيتمسح بعدها "

بكده انتى قفلتى عليه السوشيال ميديا تماما .. ندخل بقي لمرحلة الهجوم.. 

تنزلى فى نفس الوقت تعملى بلاغ حالا فى اقرب قسم او فى شرطة الانترنت وبتديهم كل البيانات اللى معاكى وبعد كام يوم بيقولولك تعالى احنا جيبنا البرنس ..

ساعتها هتكملى المحضر وهيتجاب حقك جدا واتجرأى وطول ما انتى شجاعة هيخاف منك.. 

بس حابب اقول حاجة اخيرة .. بلاش تتصورا صور تعملكم مشكله وتقع فى ايد حد يستغلها غلط ما تضمنيش ان الصور اللى بعتيها لصاحبتك حد تانى يشوفها .. او تليفونها او تليفونك يتسرق .. ما تضمنيش لان مفيش حاجة هتحميكى الا وعيك.. 

ولو كنتى اتصورتى صور بالشكل ده فياريت لما تتصوريها تحذفيها من موبايلك بأى تطبيق بيدمر الصور وهقولكم على تطبيقات فى الكومنتات ... 

وافتكروا دايما ان مفيش حماية كاملة على الانترنت

شير بقى ياجماعة مينفعش كده أنا ده انا بساعدكم اهو 😂

مهندس / اجمل 

متخصص امن معلومات وسايبر سيكيورتى