طب نعمل ايه .. معاليك ؟
كل الظروف .. حواليك
متشبكه .. تشبيك !!
وكأن مصر .. فراخ
مشتهيه .. لديك !!
***
طب نعمل ايه .. معاليك ؟
لما رموز الوطن ..
من ساسه مشغوله
.. بسياسة التدليك
وناس بتقسم وطن
إيجار - مع - تمليك !
ولسه فيه .. أوساخ
فاكره الوطن .. أكله
محتاجه .. للتسبيك !
وكل يوم .. أفخاخ
جاهزه .. تفجر فيك !
***
طب نعمل ايه .. معاليك ؟
وناس ولا تسوى نكله ..
في شاشاتنا .. طله عليك
بتحلل التحاليل ..
وتركب المحاليل ..
وتعلل التعاليل ..
وتحنجل التمويل ..
وتبروز الزغاليل ..
وتعلق الشخاليل ..
وكأن مافي فى مصر
غيرهم .. يفسر ليك !
***
طب نعمل ايه .. معاليك ؟
وشعب مصر .. الوفي
نفسه - بقى - يحتفي
بلهو - ظاهر - خفي !
يجمع شتات الناس ..
من زفة ال .. تلكيك
ويبعد ال .. أنجاس
ويرفض ال .. تشكيك
ولا يبقى شكل الوطن
ناس معاك .. وعليك !
***
طب نعمل ايه .. معاليك ؟
لو كان حقيقي .. الوطن
في - منتدى - يخليك
تضمن رجوع الوطن
بمليونية شعر ..
تعلن .. تماسك وطن
في وش من يعاديك
........................
يكفيني اكون .. شاعر
لقب - باقي - بدون تماحيك
***
* توقيع :
مواطن مرشح لمنصب مواطن
بشرط الوطن .. يكون للمواطن
وشرط المواطن .. يحس بكرامه
ويمشي القانون علي وعليك
***
شريف رستم
ليست هناك تعليقات:
إرسال تعليق