رسالة ..
( قصيدة بالعامية المصرية )
من : إنسان في مملكة الإنسانية
إلى : شاعر .. يعرف نفسُه
***
محتـاج لوقفتكم
وباحتــمي فيكم
تسندني نخوتكم
وعزوتـي بيكم
***
قال التاريخ عنكم
بلد الأمان والأمن
واشهد وانا بينكم
إني فى أمان وف أمن
***
أصل الأصاله هنــا
والعـزّ مالُه حـــدود
أصل الكَرَم من هنا
واصِل .. جدود لجدود
***
وانا ..
مصري .. وأدّ الجود
مااعرفش أخلف وعد
ولا خُنت عِشره وعهد
هاسرِد حكايتي .. هنا
واستنّىَ منكُم .. ردّ
***
حق الصديق لصديق
كلمه .. تبلّ الريــــق
وقفه .. في وقت الضيق
طوق النجاه .. لغريـــق
وكنت دول - واكتر -
وحَفظت سرُّه ف بير
ماحسبت يوم إيه أخَد
منّي قليل .. وكتير
سلّفتُه من عرَقي ..
واجب من كبير لكبير
والربّ فى التدبيـــــر
***
بديت .. بكل الودّ
بنيت .. لكنّه هدّ
حبل الصداقه وقطع
ونكرني .. وقت الردّ !!
وفراق مابنّـــا امتد ..
طب فيه حساب بنّا ..
مش أولىَ كان .. يتردّ !
***
الدنيا .. هات .. وخُد
أيامها .. جذر .. ومدّ
أعمالنا فيها .. كتاب
منقوش .. ثواب وعقاب
مافيهوش كلام .. أو ردّ
والعُمر مهما يعِدّ ..
جاي حساب ربنا ..
بالحق .. وقت الجد
***
شرَف الرجال .. كلمه
وسر .. ماينذاع
في ( دفتر الأيام )
إسمُه وصيتُه ذاع
إزاي يجيلُه مَنــام
ويصيبني بالأوجاع !
وانا اللي ماسبتوش
لحظة عِطِش .. أو .. جاع
***
علىَ كتاب الله ..
سَلّمِت انا وأقسمت
ماطلبت غير حقّي
عَرَق سنين الشقا
والبُعد .. فيما كُنت
في أراضي بيت الله
من خيرها عِشت وشُفت
وحلِمت .. واتمنّيت
بأني .. أفتح بيت
واقول صبرت ونُلت
لكنّي .. ماكمّلت !!
***
الله يجازي النفوس اللي تغرّقنا
ويلعن أبو الفلوس اللي تفرّقنــا
ولفين هانهرب ؟ وأعمالنا بتلحقنا
ننزف أنين عُمرنا .. أشعار في أوراقنا
***
أنا باستجير بيكُم ..
ياكُلّ مَن بلّغت ..
حاضرين في وسطيكُم
ملايكه بتقيّد ..
لكل مااتكلّمِت
يشهدّ عليَّ الله
بالصدق فيما قلت
وان حقّي فيكُم تاه
أبقىَ حقيقي .. مُت
وحسابي عند الله ..
***
شريف رستم
ليست هناك تعليقات:
إرسال تعليق