الثلاثاء، 4 يونيو 2013

قصيدة رثاء تكتبها والدة الشهيد محمد الجندى


والدة الشهيد «محمد الجندي» تكتب: ألف رحمة ونور عليك
-------------------------------

ألف رحمة ونور عليك
ياللى وحشتنى عنيك
ياللى وحشتنى رقتك.. كلمتك..
ضحكتك.. لمسة إيدك..
ألف ورحمة ونور عليك

ألف رحمة ونور عليك
يا ابن بطنى..
نفسى آخدك ثانية واحدة
جوه حضنى

نفسى ترجع ليا تانى..
مش تسيبنى غصب عنى

يا إلهى.. أصل ابنى كان واحشنى
ربى صبر قلبى واغفر.. من حنانك ربى زدنى
ألف رحمة ونور عليك يا ابن بطنى
ألف رحمة ونور عليك يا ضنايا..
مهما غبت عنى يا ابنى انت كل يوم معايا
انت عمرى ونبض قلبى.. ونجمة بتنور سمايا
كل يوم تيجى ملايكة جاية.. بتقدم هدايا
كل يوم يزورنى طيفك.. حاجة بتهون أسايا
ألف رحمة ونور عليك يا ضنايا

ألف رحمة ونور عليك.. يا شهيد
يا اللى كل المصريين دعولك.. والعدد عمال يزيد
يا اللى الجنة هيه دارك.. وعد ربك شىء أكيد
واللى ظلمك بكرة يندم.. ربك وعده بالوعيد
بكرة حقك يا ابنى يرجع.. وبكرة مش بعيد

ألف رحمة ونور عليك يا شهيد
ألف رحمة عليك يا محمد يا جندى

هناك تعليق واحد:

  1. كلام جميل ورائع ويوثر فى القلب هذه كلمات الشاعر (حسام فتح الله )بارك الله له اهدها الى ام الشهيد محمد الجندى , اللهم نحتسبه عندك شهيد اللهم فأرحمه وصبر قلب امه على فرقاه واحمى مصر دائما وابدا اللهم امين

    ردحذف